Wednesday, April 16, 2008

مش عارفة




احساس غريب بالقلق و عدم الاتزان !! معرفش ليه عايشة حالة انتظار مع انى فعلا مش متوقعة اى حاجة جديدة الايام الجاية!! بس عايشة حالة ترقب و حاسة ان حاجة حلوة و مهمة تحصل!! عموما الايام دى فى مشاعر كتير متضاربة جوايا ... انا محتاجة يوم اجازة من كل حاجة اعيد فيه تقييم حاجات كتير ...


Sunday, April 6, 2008

بيتنا القديم


زمان كنا ساكنين فى بيت غير البيت ده ... و رغم ان بيتنا دلوقتى اوسع الا انى كنت بحب بيتنا القديم اكتر .. يمكن كنت بشم فيه ريحة البراءة ؟؟ يمكن كنت بحب البلكونة الكبيرة اللى شايفة جزء كبير من مصر الجديدة .. عشان كنا ساكنين فى الدور التامن و ايامها مكنش فى عمارات اعلى من كدة.. كنت بحب البلكونة اوى .. كانت واسعة لدرجة اننا ساعات كنا بنطلع التليفزيون بره و شوية مخدات نحطها على الارض مع شكولاته ساخنة و فيلم جميل نتجمع كلنا نتفرج عليه .. بس انا مكنتش بحب التليفزيون .. كنت بحب شكل النجوم فى السما .. النجوم زمان كانت غير دلوقتى ... او يمكن انا اللى عنيا اتغيرت ؟؟

بس برضه كنت بحب البلكونة الصبح .. كنت بلعب فيها بالعجلة .. عجلتى كانت بسنادات ... عمرى ما عرفت اركب عجلة من غير سنادات .. ممكن اكون محاولتش .. و ممكن اكون محبتش ... بس مكنتش بحب جارتنا اللى تحت عشان صوت العجلة كان بيضايقها فمكنوش بيسبونى العب بيها كتير

..

( to be contuinued.. )